Università
di Siena
 
Dettaglio Testo
 
   

BDAL

13,1

RS

0468

Repertorio Metrico

941,2
Bibliografia Tischler 1997
Genere chanson*
N Strofe 6
Refrain R
Schema Rimico ababbabccc
Schema Sillabico 7777757577
Genere Rime mfm
flor ne verdure de pré
ne chant d'oisiaus ne m'agree,
por ce qu'ai lonc tens esté
fors de ma douce contree;
mes bien sachiez, desirree,
qu'ainz n'i ot faussé.
ainz ai l'amour merciee
qui du cuer me muet;
et puis que fere l'estuet,
nul confort valoir n'i puet.
s'onques a nul honme né
fu joie d'amors donee
por amer sanz fausseté,
Deus, ou est la moie alee?
que certes je l'ai amee
de tel volenté
et servie et honoree
que dou cuer me muet;
et puis que fere l'estuet,
nul confort valoir n'i puet.
partir d'amors est noient,
et cil qui s'en veut retraire
lonc tens ai esté pensans
coment li peüsse plaire.
de servir la debonaire
sui je si joians;
c'est li couz de mon affaire
que dou cuers me muet;
et puis que fere l'estuet,
nul confort valoir n'i puet.
je sui li fins desirans
qui ne puet sa joie taire
por moistreir malvaix semblant
dont pluxor ont grant contraire.
panseir a la debonaire
m'est joie si grans;
c'est li plux de mon afaire
ke del cuer me muet.
bien voi que fere l'estuet,
nul confort valoir n'i puet.
chanson, j'io aucuns conter
qu'il veut bien qu'amors l'ocie;
ne.l vodroie nes penser,
car morir n'en vueil je mie.
ainz aim melz, que que nus die,
vivre et bien amer;
et servir ma douce amie
que dou cuer me muet.
et puis que faire l'estuet,
nul confort valoir n'i puet.
chanson, la t'estuet aler
ou j'atent greignor aïe.
plus n'i os par toi mander,
mes bien la losenge et prie,
que touz sui en sa baillie
tant qu'ai a durer:
qu'aprés ert m'ame s'amie,
que dou cuer me muet;
et puis ke faire l'estuet,
nuls confors valoir n'i puet.