Università
di Siena
 
Dettaglio Testo
 
   

BDAL

 39,2

RS

 1664

Repertorio Metrico

 861,9
Bibliografia Zai 1974, apud Poiron 1994, p. 1045
Genere chanson
N Strofe 6
Refrain
Schema Rimico ababbaaba
Schema Sillabico 888888888
Genere Rime mm
d'Amors, qui m'a tolu a moi,
n'a soi ne me veut retenir,
me plaing ensi, qu'adés otroi
que de moi tace son plaisir,
et si ne me repuis tenir
que ne m'en plaigne, et di por quoi:
car ceus qui la traïssent voi
souvent a lor joie venir,
et g'i fail par ma bone foi.
s'Amors pour.essaucier sa loi
veut ses anemis convertir,
de sens li vient, si com je croi,
qu'as siens ne puet ele faillir.
et je, qui ne m'en puis partir
de celi vers qui me souploi,
mon cuer qui siens est li envoi;
mes de noient la cuit servir
se ce li rent que je li doi.
dame, de ce que vostres sui,
dites moi se gré m'en savez.
nenil, se j'onques vous conui,
ainz vous poise quant vous m'avez.
et puis que vos ne me volez,
dont sui je vostres par ennui.
mes se ja devez de nului
merci avoir, si me souffrez,
que je ne sai servir autrui.
onques du buvrage ne bui
dont Tristan fu empoisonnez;
mes plus me fet amer que lui
fins cuers et bone volentez.
bien en doit estre miens li grez,
qu'ainz de riens efforciez n'en fui,
fors que tant que mes euz en crui,
par cui sui en fa voie entrez
donc ja n'istrai n'ainc n'en recrui.
cuers, se ma dame ne t'a chier,
ja mar por çou t'en partiras:
tous jours soies en son dangier,
puis qu'empris et comencié l'as.
ja, mon los, plent n'ameras,
ne pour chier tans ne t'esmaier;
biens adoucist par delaier,
et quant plus desiré l'auras,
plus t'en ert douls a l'essaier.
merci trovasse au mien cuidier,
s'ele fust en tout le compas
du monde, la ou je la quier.
mes bien croi qu'ele n'i est pas,
car ainz ne fui faintis ne las
de ma douce dame proier:
proi et reproi sanz esploitier,
conme cil qui ne set a gas
Amors servir ne losengier.