Università
di Siena
 
Dettaglio Testo
 
   

BDAL

 50,1

RS

 0303

Repertorio Metrico

 1505,1
Bibliografia Wallensköld, 1968, 02
Genere chanson
N Strofe 5
Refrain
Schema Rimico abbccddc
Schema Sillabico AAAAAAAA
Genere Rime mmmm
si voiremant con cele don je chant
valt melz que totes les bones qui sont,
et je l'aim plus que ren qui soit el mont,
si me doint Deus s'amor senz decevoir;
que tel desir en ai et tel voloir,
ou tant ou plus, Deus en seit la verté,
si con malades desirre santé,
desir je li et s'amor a avoir.
or sai je bien que riens ne puet valoir
tant con celi de cui j'ai tant chanté,
c'or ai veü et li et sa bealté
et si sai bien que tant a de valor
que je doi faire et outrage et folor
d'amer plus halt que ne m'avroit mestier;
et non por cant maint povre chevalier
fait riches cuers venir a halte honor.
ainz que fusse sospris de ceste amor,
savoie je autre ient conseillier,
et or sai bien d'altrui geu enseignier
et si ne sai mie lo mien juër;
si sui con cil qui as eschas voit cler
et qui tres bien ensengne as autres gens,
et kant il jue, si pert si son sens
qu'il ne se seit escore de mater.
hé! las, dolanz, je ne sai tant chanter
que ma dame parçoive mes tormenz,
n'encor n'est pas si granz mes hardemanz
ke je li os dire les mais que trai,
ne devant li n'en os parier ne sai;
et kant je sui aillors devant autrui,
lors i parol, mais si pou m'i dedui
k'un anui valt li deduiz que j'en ai.
encor devis comment je li dirai
la grant dolor que j'en trais senz anui,
ke tant l'ador et desir, kant g'i sui,
que ne li os descovrir ma raison;
si va de moi con fait del champion
qui de lon tens aprent a escremir,
et kant il vient ou champ as cous ferir,
si ne seit rien d'escu ne de baston.