Università
di Siena
 
Dettaglio Testo
 
   

BDAL

65,1

RS

0115=0562

Repertorio Metrico

1388,1
Bibliografia Petersen Dyggve 1951, p. 338
Genere chans*
N Strofe 3
Refrain
Schema Rimico abbabbcddc
Schema Sillabico 777777AAAA
Genere Rime fmfm
bien ait Amors qui m'ensaigne
e mos e chans a trover,
si que j'en doi bien chanter
quant altre rien n'i gahaigne
mes cuers qui mes fait penser,
ançois m'esprent plus d'amer,
e si me dist e semont et aonde
que je li face encor plus mais avoir;
mais Amors m'a si mis en nonchaloir
que ja ne quit que nuis biens me responde.
ce qu'ele m'est si estraingne
fait l'amour croistre e dobler
si que ne m'en puis torner.
suens sui, coment que il praingne,
q'en tot cest mont n'a sa per
ne qui tant face a loer.
bele est et gente e graile e graisse e blonde:
ce me fait plus mon desirier doloir,
mais encor cuit bone merci avoir,
s'ainc nus hom l'ot por bien amer el monde.
car donast or nostre Sire
que cascuns triciers e faus
fos tos torteus e tos caus,
ses porroit hom bien eslire
adés entre les loiaus,
car jo sai bien que par aus
avront sovent no vrai amant damatge.
car pleüst or a Deu par son plaisir
che quant il doivent requerre et mentir,
qu'il ne seüssent parler en nul lengatge.