Università
di Siena
 
Dettaglio Testo
 
   

BDAL

 102,19

RS

 1350

Repertorio Metrico

 101,1
Bibliografia Ménard 1983, 34
Genere chanson* note
N Strofe 5
Refrain R
Schema Rimico aaaabaaaabbbb
Schema Sillabico 77775777755BE
Genere Rime mm
quant ces moissons sont cueillies,
que pastoriax font rosties,
baisseletes sont vesties,
rabardiax font rabardies,
maint musart i va.
cil de Feuchiere et d'Aties
ont prises espringueries
et mult granz renvoiseries
de sons, de notes d'estives
contre ceus de la.
mes vous orroiz ja
que Guiot i vint qui turuluruta
valuru valuru valuraine valuru va.
cil d'Avaines les parties
vinrent a granz gens rengies.
en loges et en fueillies
et en mult granz praeries
chascuns s'envoisa.
li ami et les amies
orent ganz et souquanies
et coteles haubergies
et coifes a denz pincies.
chascuns s'atifa
ci et ça et la;
mes Guiot i vint qui turuluruta
valuru valuru valuraine valuru va.
li filz au prestre d'Oignies
qui tant en a barcheignies
que cinc en a fïancies,
dont les trois sont engroissies,
mult se merveilla
de Guionet: granz envies
li prist; lors fist deablies,
qu'il vet saillant a poignies
entor un chapiu d'orties.
mult se debruisa,
mes touz les passa
Guionet pour ce tant biau turuluruta
valuru valuru valuraine valuru va.
a deus touses renvoisies,
cointement apareillies,
vint Poissonet et Helies,
quant Fouques de Sapignies
vers aus s'avança:
des mains leur a enrachies!
celes n'en sont mie lies,
ainz en sont si esmaries
et s'en sont si corocies
que l'une en plora.
tost la rapaia
Guionet por ce tant biau turuluruta
valuru valuru valuraine valuru va.
Antoines et Acaries
et Pinçonnez et Helies
jurent les saintes hachies
que Fouques ses glotonnies
encor conperra.
quant Guiot vit les folies,
lors conmença melodies,
notes et espringueries
si que leur melencolies
tost leur rapaia.
le pris enporta
Guion que de tous tant biau turuluruta
valuru valuru valuraine valuru va.