par grant franchise me covient chanter,
se vuil avoir la rien que plus desir;
mais je ne sai ou je puisse trover
bons moz ne chant, que cil qui crient morir
ne puet s'onour a grant joie atorner.
et nonpourquant fine Amour le m'enseigne
d'amer celi qui la male mort preigne,
qui ne me vuet mes maus guierredoner. |
li faux amant qui se ventent d'amer
font les lëaus de male mort morir;
et les dames en font mout a blasmer
qui aimment ces qui prïent por trahir.
por ce morrai c'onques ne soi fauser;
ne puis müer mon domage ne plaigne.
douce dame, froiz glaives vos destroigne!
trop me faites de parfont sopirer. |
douce dame, cui j'aour et souploi
et servirai en trestout mon aé,
sor tote rien a vos servir m'outroi,
se mes servises vos venoit a gré.
mais cist travaux m'iert adés, bien le voi,
quant plus vos serf et je plus vos truis fiere;
mieuz fussiez vos levee froide en biere
que longuement en gabessiez de moi. |
or ai je dit come fous estreloi;
ja li mesfaiz ne m'en soit pardonez,
quant maudite ai celi cui plus doi foi!
servirai de la bone volenté,
et se li plait que me retoigne a soi,
amerai la come ma dame chiere;
ou se ce non, la passions la fiere,
s'en brief terme ne prent de moi conroi. |
douce dame, bien me devez aidier,
soul por itant que mesdisant felon
se sont venté que par lor losengier
feront partir deux amanz sanz raison.
moi aveis mort, c'ains ne vous so trichier;
las, tant mar vi vostre bele semblance
et vos beauz eulz qui m'ont navré sanz lance!
males broches les vos puissent saichier! |
beaus sires Deus, que me vaut esloignier,
puis que vers li ne truis desfension!
amee l'ai de leal cuer entier
n'onques nul mal n'i pensai se bien non;
por ce morrai c'onques nul mal n'i pensai se bien non;
pour ce morrai c'onques ne soi trichier.
tolu m'avez et joie et alejance;
mais veillece qui d'autrui prent vengence
vostre gent cors si me puist justisier. |
trahi m'avez, douce dame, et por quoi?
ja n'ai je riens envers vos desservi;
por vostre amor ai je guerpi ma loi
et croi en Deu maugré toz mes amis.
et si faites de moi touz voz bofoiz;
trahi m'avez, douce dame honoree!
trahi m'avez, vos soiez traïnee!
si voz porroiz mieuz amender vers moi. |
et nonporquant je ne m'en quier movoir
de vos amer, s'en devoie morir,
que mieuz vos vuil servir en bon espoir
que totes celes dou mont joïr,
que Deus vos fist si faite a mon voloir
c'onques ne vi si tres bele rien nee.
male aventure et male destinee
et maus blasmes vos faces moins valoir! |
et s'autrement n'en je puis joie avoir,
Deus vos face si vielle et si ridee
que touz li monz fors moi touz soux vos hee,
savoir se ja me porroiz escëoir. |