Università
di Siena
 
Dettaglio Testo
 
   

BDAL

 207,1

RS

 1429

Repertorio Metrico

 776,3
Bibliografia Petersen Dyggve 1942a, p. 79
Genere chanson
N Strofe 7
Refrain
Schema Rimico abababba
Schema Sillabico AAAAAAAA
Genere Rime mf
chanter me fait ce dont je criem morir:
loiaus amours et douce desirree,
si me merveill conment puet avenir
que ma mors est la rienz qu'ai pluz amee.
tant ai douçour a mon mal soustenir:
quant pis me fait Amors et mieuz m'agree.
Dex! verrai ja la pramesse averee
dont fine Amours me deüst enrichir?
ma pramesse m'est tournee a faillir,
esperance s'en est de moi alee;
s'einsi la pert, ne sai que devenir.
ahi! dame, con dure dessevree,
quant nul confort de vous ne puis oïr!
bien est m'amors esprise et alumee;
mout me poise quant vous dis ma pensee,
quant par ce pert dont deüsse joïr.
et non por quant ne se doit esbahir
de mal soufrir cil qui a servir bee,
qu'assez aim mieuz ceste painne a sentir
c'un tout seul jour l'eüsse entroublïee,
quant je recort souvent et a loisir
sa grant biauté, fine et fresche esmeree,
qui si m'ocit coiement a celee,
et je chant, las! pour ma dolour couvrir.
douce dame pour cui plaig et souspir,
la mieuz vaillanz qui soit de mere nee,
de vous ne vueill ne ne quier departir,
quar pour vous ai toute joie oublïee.
tant finement vous aim et vous desir
que ja sanz mort n'en sera mais ostee
la granz amour qui m'est u cuer entree;
ne sai se ja la me voudroiz merir.
onques ne seu amer a repentir,
pour ce en ai mainte painne enduree,
quar j'ai un cuer a Amours maintenir
ferm et loial, douce dame honouree.
or doinse Dex qu'il vous viegne a plaisir
que vostre amour fine me soit dounee,
qu'en la meillour doit bien estre trouvee
la granz pitiez dont mercis doit venir.
par Deu, Noblet, la mercis comparee
vaut mieuz assez et pluz est desirree
que dons qui est donnez sanz deservir.
par Dieu, Gilet, del mont la pluz loee
endroit celi est vilainne prouvee
cui mes cuers est dounez sanz revenir.