Università
di Siena
 
Dettaglio Testo
 
   

BDAL

231,9

RS

1655

Repertorio Metrico

752,18
Bibliografia Tischler 1997
Genere chanson
N Strofe 6
Refrain R
Schema Rimico ababababccc
Schema Sillabico 77777777734
Genere Rime ffm
qui bien veut amors descrivre?
Amors est et male et bone;
le pluz mesurable enyvre
et le pluz sage embricone;
les emprisonez delivre,
les delivrez emprisone;
l'un fait morir, l'autre vivre;
a l'un tolt, a l'autre done.
et fole et sage est amors:
vie et mors,
joie et dolors.
Amors est large et avere,
s'il est qui voir en retraie;
amors est douce et amere
a celui qui bien l'assaie;
amors est marastre et mere,
premiers bat et puis rapaie;
et cil qui pluz le compere
c'est cil qui pluz s'en esmaie.
et fole et sage est amors:
vie et mors,
joie et dolours.
Amors vait par aventure,
chascuns i pert et gaaigne;
par outrage et par mesure
save l'un, l'autre mahaigne.
eürs et mesaventure
sunt adés en sa compaigne;
por c'est raisons et droiture
que chascuns s'en lot et plaigne.
et fole et sage est amors:
vie et mors,
joie et dolors.
sovent rit et sovent pleure
qui bien aime en son corage;
bien et mal li corent seure,
son preu quiert et son damage.
et se li biens li demeure,
de tant a il avantage
que li biens d'une seule heure,
le malz d'un an rassoage.
et fole et sage est amors:
vie et mors,
joie et dolors.
qui chiet en desesperance
por dolor et por mal traire
tot a perdu sanz faillance
ne de cel gieu ne set guere;
car li mal et la pesance,
les dolors et le contrere,
sont de la meillor cheance
qui bien savront son gieu fere.
et fole et sage est amors:
vie et mors,
joie et dolors.
la Chievre dit sanz devise
d'amors, en la definaille,
qu'ensi com il la devise,
einsi le troeve on sanz faille;
car cil cui Amors justise
et qui por li se travaille
n'en porroit en nulle guise
le grain cueillir sanz la paille.
et fole et sage est amors:
vie et mors,
joie et dolors.