Università
di Siena
 
Dettaglio Testo
 
   

BDAL

 265,1161

RS

 1835

Repertorio Metrico

 1064,1
Bibliografia Petersen Dyggve 1938, 27
Genere chanson serventois*
N Strofe 7
Refrain R
Schema Rimico ababbccc
Schema Sillabico AAAAAAAA
Genere Rime mmm
molt lieement dirai mon serventois,
car j'en truis bien en mun cuer l'achoisun:
li Poitevin, li Gascun, li Anglois,
li cuens Raimunz et li rois d'Aragun
unt mal joï de leur enprisiun;
par devers aus est tornez li sordois.
Diux, gardez mos le seignor des François,
Charle et Aufor et le conte d'Artois!
molt fist li cuens de la Marche que fos
qui mit sun cors et sa terre a bandon
contre le roi: ce fist il por le los
de sa femme, qui ne quiert se mal non;
mes l'on li a si pelé le grenun
k'a toz jorz mes en iert pis a ses oirs.
Diux, gardez mos le seignor des François,
Charle et Aufor et le conte d'Artois!
li Poitevin, li Gascon, li Anglois
garderent mal le pont de Tailleborc,
que malgré aus i passerent François
et chacerent et mistrent en retor:
dusq'en Seintes n'i firent unc estor;
et sachoiz bien, la fu pris li Barois.
Diux, gardez mos le seignor des François,
Charle et Aufor et le conte d'Artois!
la bataigle le conte Boloignois
vint premerains a cel assemblement;
molt i fu prués Raos de Clarmontois;
cil de Pontis i conqist los molt grant:
dusqu'as portes les menerent batant.
a mie nuit s'en foï li lor rois.
Diux, gardez mos le seignor des François,
Charle et Aufor et le conte d'Artois!
aprés çaus vint Ansiau de Triaignel
et ses compainz Herarz de Valeri,
- bien fu armez chascun sur un morel -
cil de Beaujeu et Uges d'Antegni.
lors furent bien li Anglois envaï:
en la vile les mistrent sor lor pois.
Diux, gardez mos le seignor des François,
Charle et Aufor et le conte d'Artois!
molt fist li rois que pruez et que vaigllanz,
li cuens d'Artois et li cuens de Poitiers,
qui monterent por seqeurre lor genz
armé de fer sur les corranz destriers.
li messagier avrunt mauvés loiers
qi le dirunt le conte d'Aubigois.
Diux, gardez mos le seignor des François,
Charle et Aufor et le conte d'Artois!
mun serventois envoi au Champenois
et Archambaut, au seignor de Borbun,
et au Flament et au conte de Blois
et a celi qui tient Biaune et Dijun,
q'envers le roi ne pensent se bien non;
loial soient, si ferunt que cortois.
Diux, gardez nos le seignor des François,
Charle et Aufor et le conte d'Artois!